美股周二大幅反彈，銀行股顯著回升，控（005）昨日延續外圍升勢，高開42元，勁升逾一成二，帶動恒指大幅高開534點，高見12228點。內地A股高開低走，恒指高位無以為繼，升幅逐步收窄，尾段重上12000點，但在「勁假時段」再被「質」低73點，12000點得而復失，恒指收報11931點，升237點或2%。期指收報11933點，升333點，比現貨高水2點，成交67560張。國企指數重上7000點，收報7008點，大市成交上升至447億元。
兩大本地藍籌昨日宣佈業績，新地（016）公佈去年底止中期業績，股東應佔溢利6.92億元，較去年同期大倒退九成半，每股盈利27仙，擬派中期息每股80仙。該公司撇除投資物業公平值變動，股東基礎溢利按年跌27%至45.35億元，遜於市場預期。

至於另一隻國泰（293）仲慘，蝕了85.6億元，符合市場預期，每股虧損2.175元，不派息，期內須為2009年至11年的燃油對沖合約未變現市值計價虧損76億元；聯屬公司國航（753）的燃油對沖合約，亦出現未變現市值計價虧損撥備10億元。公司仲話，若油價維持於現有水平，截至今年2月底的未變現燃油對沖市值虧損為19億元，要油價上番75美元才甩難。國泰現時財政壓力不輕，唯一慶幸係有個好有錢媽媽叫太古幫手頂實。

港股昨日反彈，全靠前晚杜指大升379點，港股在美國預託證券收市等如恒指12415點，升720點，香港昨日個市就跟唔足，早段期指一度低水近200點，比近日正常低水100點左右低好多，可見期指市場早段沽盤甚大，拖番低現貨；隻控在美國的預託證券價收報41.93元，比香港前日收市價37.6元高11.5%，控在倫敦上日更高見44元，但來香港就唔係好爭氣，一開市最高造過42元，之後就一級一級咁落，收市只係升2.3%，收報38.45元，成交50億元。

出口急跌香港勢危

跌市股份反彈最大動力是平淡倉，即係有人沽空，突然遇到個市大升，就落個「市價盤」平倉，咁就好易推住隻股大力彈，但睇控昨日的走勢，沽空的淡友無好急咁平倉，或者佢好有實力去坐淡倉，唔急於不問價平倉。

控今日除權，即今日買賣的股份開始不附帶供股權，昨日除權前仲有咁多人趕住沽貨，壓住個價，連供股權都唔要，背後玄機可堪玩味，茶友不排除係有大戶想係除權前先沽貨，壓住大笨象反彈的氣勢。按控昨天收市價38.45元計，控的理論除權價係35.38元，今日佢點開價就由市場話事啦。

港股昨日在下午3點前回得最多，在內地股市收市後，大市氣氛好番，期指收11933點，高水3點，計入控除權等因素，期指高水有成100點。

港股跟唔足美股無大升，除話前一日升之外，亦和內地股市唔係好升得起有關。內地昨日公佈出口數據好差，2月當月出口總值同比下降25.7%；進口總值同比下降24.1%，雖然因為出口比入口跌得多，還有48億美元貿易順差，但出口大跌25.7%，呢個數字認真唔細，香港經濟依賴內地的出口，可以想像香港2月的出口數字唔會好，GDP亦受壓。

再睇番上一日中國公佈的通脹數字，2月份居民消費價格（CPI）同比由上月上漲1.0％轉為下降1.6%，雖然因為去年基數高，今年2月回落都有理由，但通縮的危險日近。

熟悉美股的中環茶友話，美股杜指勁升379點，收報6926點，升到5.8%，表面看是花旗話今年1、2月有錢賺，兼且傳聞美國證監會又考慮收緊沽空條件，觸發大量沽空盤平倉，不過最後升成5.8%，除沽空盤都有實盤買貨，主要係對沖基金，他們集中買跌到好過份的股份，所以金融股升得特別勁，例如花旗上日股價跳升38%，但對沖基金可以今日來聽日走，所以單靠對沖基金買貨，升勢能否持續成疑。

大反彈有待確認

佢話，目前未見比較長線的互惠基金和退休基金入場，顯示它們對後市仍然缺乏信心，要看美國有無實質性的好消息，可以令這長線大戶入場，才能確認這是一次「真正的大反彈」，若然係咁現時都係入市博反彈的良機，但如果無持續利好的消息，可以令長線的基金入場，小心這次「熊仔陷阱」，升幾升就玩完。

陸羽仁

閱讀全文...

大笨象控（005）星期一「勁假時段」最後三秒被插至驚人低位33元後，控昨日反攻，高層開記者會力挺自己前景秀麗，控股價亦強力反彈，高開近13%，重回37元水平，恒指順勢高開198點後反覆向上。內地A股止跌回升，恒指升幅亦跟隨擴大，午後最高曾逾400點，之後走勢略為回順，在11700點間橫行至收市。可能係全城都「牛咁眼」睇實，股市在「勁假時段」平穩過渡。

恒指收報11694點，大升349點或3.1%，期指收報11600點，升208點，比現貨低水94點，成交縮減至57122張。國企指數收報6881點，升155點或2.3%。大市成交只有335億元。港人最愛但又最傷的控（005）昨日反彈，開市重回上日「勁假時段」大跌前的價格，之後全日在37元與37.65元間窄幅橫行。收市報37.6元，回升13.9%，成交23.7億，比上日少一半成交。控在倫敦市初段亦造好，升番上41元以上的水平。

歐資行大手沽貨元兇

控早一日在「勁假時段」最後幾秒被人喪插，連政府都表示關注，叫證監會去查，唔知係唔係因為這個原因，控昨日的沽空盤收斂，在沽空榜三甲不入。無論如何，當日「勁假時段」發生乜事，惹起各方關注。

控昨日下午專門開了一個記者會為自己護航，豐亞太區行政總裁霍嘉治話，非常關注控股價近期大幅波動，上日「競價時段」股價大跌，並非恐慌性拋售，佢認為係市場莊家和對沖基金所為，估計有人希望插低控股價，再在將來買平價的供股權供股。豐已發覺有對沖基金狙擊緊佢，特別跳出來玩踢爆，把狂沽者暴露出來，希望散戶唔好跟住恐慌性出貨。

控業績唔靚兼低價供股，正如我昨日所講，本身露出傷口，自然惹起鱷魚垂涎。過去呢隻象又高又大隻，鱷魚奈佢唔何，但如今隻大象受傷流晒血仲要過河，大鱷自然圍晒上來啦！

有中環金融界高人仲講起控供股的內幕，原來控找供股包銷商時，除了找而家的包銷商高盛和摩根大通之外，仲有搵一間歐資銀行，但那間歐資行接受到包銷價低過28元，只接受到26元左右，未符控的要求，所以最後控未有用那家銀行做包銷，結果控的供股大計在公佈前的星期三（2月25日）已定好，但由於控供股計劃和不同的人傾過，消息已漏晒出街。高人話，控的底牌被人摸清，所以未公佈業績，春江鴨已經搶先沽，沽貨位約在50幾元的水平，那時散戶仲想炒控業績，結果就變人沽貨佢地接貨了。

無巧不成書，上一日「勁假時段」最後的33元大沽盤，聽聞也是那間歐資行做的，究竟它是代客做還是自己做，就有待考證了。家傳聞有一家對沖基金已沽空了1億英鎊的控，相信沽空的也不止是一家對沖基金，相信不少大鱷已圍埋等開飯了。

英政府入股失發鈔地位

高人估計，如果有對沖基金圍埋來狙擊控，已摸清大笨象的底牌，控供股集資之後，若美國次按扺押資產質素進一步惡化，再需要大筆資金時，就唔係再咁易搵到錢啦。第一，供完一次後股價再跌，控已好難再供股集資了。再者，亦唔好以為佢咁易去倫敦搵英國政府入股支持，大家唔好唔記得，香港政府定了一條例，如外國主權機構持有香港的發鈔銀行多於20%股權時，便會取消其發鈔地位（當時主要針對渣打銀行叫新加坡主權基金入股的舉動），但控一叫英國政府入股，需要金額龐大，政府佔股當然不止20%，這樣豐順手失去埋香港發鈔銀行的地位，其影響亦難以估計，所以可供豐選擇的再集資渠道極其有限，佢只有求神拜佛望美國經濟快無事。

控面對這些掣肘，連陸羽仁都知，走去沽空的對沖基金無理由唔知，所以我估呢班大鱷要食大茶飯，唔係咁易請得佢走，亦唔係話想低價供股食你10蚊8蚊就走。一般估計，佢地唔係想殺到控供唔到股，所以咬到咁上下又會放口，讓控成功供股，搵埋千幾億新錢入場，佢才開動機器食大茶飯，未來幾個月，控的前路都幾凶險。

另一方面，控亦擺出一個積極搶生意的格局，豐昨日宣佈降低首年新做按揭息率至2.18厘，市場預計本地銀行將展開按揭減息戰。減按息有利樓市，這也是地產市場近期難得遇上的好消息了，地產界大孖沙出面包銷控供股，豐都算來番一個投桃報李吧！

另外，《頭條網》正進行控供股調查，請各位讀者登入表態吧！

陸羽仁

閱讀全文...

控（005）無情情又來爆一鑊，股價隨外圍急插，到收市前競價時段更插低到33元，大跌24%，控大跌拖住港股向下沉，恒指下午跌幅擴大，收報11,344點，跌576點。期指收報11,392，跌452點，比現貨高水47點，成交63,633張。國企指數先升後跌59.89點，報6,725.58點，大市成交357億元。

我尾市時睇住控在「勁假時段」的報價，本來好好地仲有37元，突然一閃閃落33元，無幾耐就收市，創造控一日跌10.5元的歷史，跌24%，成交金額47億。從控股東的角度，昨日可以算係一場控股災，因為以往股災控都未必會單日跌24%咁多。控咁跌法其他金融股都無運行，同系的恒生（011）跌9%、中銀香港（2388）跌4.6%、東亞（023）跌7.4%、渣打（2888）跌2.2%、宏利（945）跌8.5%。

由於「勁假時段」控有4億成交，佔全日成交十分之一左右，如果有人睇通買盤數量及價位，要人為造低個價唔難，搞到部份控牛證打靶，期指又扯低埋，「勁假時段」容許大股的價格以10%以上的幅度波動，真係唔知益邊個。但控的真正走勢，要睇番今日佢彈唔彈至知，不過無論如何佢跌得咁急，都有人被人狙擊的味道，控個底已經被人睇穿，狙擊佢都有肉食。

阿婆百幾萬買控

千祈唔好以為我話可能有人在「競假時段」玩，就如我話控唔應該跌咁多，我的睇法剛好相反，控如果唔係身體咁弱，人又邊有咁容易一日質低佢24%，或者想在「勁假時段」隊佢12%，都無乜可能。佢係體弱在先，才吸引玩家入場玩佢，正所謂「唔內傷唔會俾人玩」，所以唔好將有人玩，等同控唔應該跌，更唔應該等同佢好抵可以買。

倒轉睇，如果控短期無像樣反彈，反而再探底的話，就同28元供股價水平好接近，咁危險性就愈來愈高啦，雖然佢有包銷商簽字同意包銷，但跌到變型時有無意外，就無人可以講得到。

經紀張昨日專登打電話來多謝我，因為我一直叫佢唔好覺得控抵，「盲舂舂」走去買，到控出完業績宣佈供股後，我繼續叫佢唔好買，佢亦叫好多客仔唔好盲目去追貨。

我最近聽到一個古仔，有一個80幾歲的阿婆，在豐70、80元的時候，覺得好平，買1.6萬股控，全副身家百幾萬放晒落去，家苦惱緊如何籌錢供股。我聽到心都實埋，阿婆可能唔捨得食、唔捨得，捱一世人先至儲到百幾萬，如今已經唔見6成，仲要搵錢去供股。香港人就係咁，一係唔信你，一係就信到十足，見親控跌都話去買，話極都要買。港人信任控，就好似坐在井中睇住個天，見到月光又大又圓，以為天氣好正，佢地睇唔到井外其他地方的天氣，已經行雷閃電，雷雨交加，不過烏雲暫時未吹到個井所處的地區而已。阿婆唔知美國情況係點，無得好講，但若是年輕力壯的讀者，經常睇呢個專欄的話，應知道美國金融股好大件事，控的美國同業已經跌到七個一皮，所以控好難獨善其身。

美股炒手做淡唔願走

如果你買控只係博反彈，短線炒，咁就好難講，唔一定唔得，考眼光和運氣，每一天都可以博佢短期見底，不過若買入後唔對路，輸夠10%最好打靶，昨日一日就到打靶位。打完靶即使再買都唔拘，又係蝕10%打靶就得。不過睇錯千祈唔好死，小心一就上身。

有熟悉美股的中環茶友話，美股彈唔起，除了經濟大勢及奧巴馬政府無料到之外，亦有市場炒作原因。佢話早段美股從反彈中退潮時，大量交易商加入造淡行列，結果在呢一浪退潮跌市中，佢地無蝕錢，仲搵唔少，你睇大金融股如摩根大通一跌起上來，每日就5%、10%咁跌，沽空者賺到笑，唔係幾捨得走。

佢話，家你問美股的交易商，佢地多數相信反彈快將來臨，但就唔係太多人搶先入市好倉。因為佢地一方面仍然在沽空盤中賺緊錢唔捨得走，另一方面好怕反彈不長，做好倉走唔切，一個月就唔見10%、20%。佢怕控都係咁，雖然正常應該反彈，但事實上吸引大量淡倉沽佢，淡友食得太滋味，唔係幾捨得走。

陸羽仁

閱讀全文...

上周五港股恒指執位，無大驚喜，由於控（005）佔恒指的比重要由9%升番上15%，散戶一心等指數基金在收市前競價時段掃貨，認為起碼要掃高控1元以上，不過呢「係人都知的事件」，通常有驚無喜，在競價時段一度有人好玩咁掛出33元的控超低價買賣盤，搞到控股東一額汗，最後控在競價時段只係彈番0.25元，全日仍跌1.3元，收43.5元；恒指就跌289點，以11921點收場，跌破埋12000點大關。
上周五外圍股市穩定，美股杜指升32點，收報6626點，但豐股價就唔多穩，佢在美國預託證券收報39.56元，大插3.94元，雖然我地可以預計，香港散戶偏愛豐，到香港市時又會血肉長城一番，入市買控，令股價無外圍跌咁多，不過香港散戶真係要小心檢討一，點解鬼佬市場咁睇淡控，香港人又咁睇好。

里昂睇控見28元

控淡友里昂證券繼續唱淡，里昂證券係最早一間唱淡控的外資行，佢並無因為控集資充實資本而轉調，佢在報告中更把控的目標價，由41元大降至28元，降幅32%，即是去到控供股價的水平，為迄今看得最淡的大行。里昂指出，控美國子公司豐融資去年第4季度的未償還貸款為620億美元，以美國現況，債務人能否還錢有很大疑問，佢估在今年第4季控可能降至無股息，亦調低控明年及後年的盈利預測。

雖然外資繼續睇淡，但股票唔應該一直跌唔氣，控等外圍要沽的沽得八八九九時，應該有點反彈，不過小心反彈過後，控過幾個月真係慢慢跌番落供股價。歐美好多大銀行供完股彈完之後，最後始終要跌穿供股價，蘇格蘭皇家銀行就係慘痛例子，控會唔會係例外呢？

美股連續創新低，但內地股市香港股市跟唔足，有跌唔落去之感，有人因此猜度港股已經見底，但陸羽仁就無咁樂觀，擔心這只是滯後反應。

首先要睇美股今次接連破底的原因。美股深度探底，皆因新總統奧巴馬和新財長蓋特納的政策唔對路。蓋特納上任之前，好多人話呢個前紐約儲備銀行行長好打得，佢一上任第一場大騷係搞拯救金融業方案，但搞到最後一刻難產，結果只係搵個唔湯唔水的「流料方案」來頂檔先，美股就係由當時開始頂唔順，不斷下滑。

總統無料商家玩

蓋特納的老闆奧巴馬亦唔見得幾好，奧巴馬靠一句口號「Change」（改變）上台，要向有錢人開刀，取悅窮人，所以拯救金融業方案未搞到，先搞出限制華爾街高層花紅的方案；經濟未搞番掂，已經要向有錢人加稅以爭取長遠削減赤字，家班美國有錢佬威脅要否決預算案，奧巴馬就話要不惜一切代價和反對者玩到底。

華爾街班銀行佬的確幫唔落，佢確實係貪過龍，玩大，才搞出次按危機和金融海嘯，不過要對付佢，又係唔係要馬上出手呢？美國的有錢佬的確好多錢，可以交多稅填赤字，但又係唔係一定要金融海嘯的高峰時出招呢？

有個中環茶友舉個好好的例子，佢話你個仔頑皮到加零一，打爛晒隔籬屋，但佢打爛人同時，亦跌穿埋自己個頭，血流披面咁走番你屋企，你一見佢就大，仲埋枝雞毛掃出來，起勢咁打佢，唔理佢額頭血係咁流，咁做唔真係見仁見智，合理一做法應該係幫個衰仔止血先，貼好膠布，等佢到夠啦，先至雞毛掃出來打都未遲。

中環茶友話，美國政府提唔出果斷的拯救金融業措施，本來已經好差，再加上奧巴馬要向有錢人發炮，咁就差上加差，美國向來就係由軍火商、石油商和華爾街巨頭聯合管治，奧巴馬一下子向各方面開刀，令人擔心若預算案過唔到國會都唔知點算。既然政府的行為無助美股反彈，結果就只能任由美股超跌，跌到短期跌無可跌的位置才自然反彈。

股市受經濟走向影響，經濟走向受政府影響，美國政府剛好換屆，新總統上任前好難估佢政策係點，但奧巴馬上任兩個月，其行事手法開始露一腩頭，已令人對新政府的能力有疑問，正增加美國經濟L形衰退的風險，V形反彈的希望已愈來愈遙遠。

末日博士愈睇愈淡

有末日博士之稱的紐約大學經濟學教授羅賓尼（Roubini），雖然佢一早就睇淡，但係見到家的經濟狀況都幾驚，話經濟之差，仍出乎他的意料之外。一年之前，佢估計美國經濟要經過18個月的衰退（大約到今年第3、4季），然後出現一個U形的復甦。但家羅賓尼估計衰退要起碼24個月（到2010上半年）甚至36個月（2011年上半年），之後出現日本式的L形停滯的風險正在上升，即係有一段長時間雖然不再是負增長，但也只是零增長或微量增長。

羅賓尼話美國經濟在去年第4季收縮6.2%，擔心世界其他地方的情況更要壞得多，雖然佢經常批評美國政府的救市和刺激經濟措施，但其他的地方的政府對應危機的措施，仲差過美國好多，這才是佢最擔心的地方。羅賓尼其實係話緊今次唔止美國衰，危機仲擴散出去，其實呢個觀點，同阿爺的睇法有相似。

中國怕海嘯襲亞洲

熟悉中央思維的高人話，阿爺眼見美國金融危機不受控，轉眼第二波吹到歐洲，特別係東歐非常大鑊，借錢俾佢的歐洲銀行跟住中招，當中奧地利的銀行受創最深，家東歐搵緊國際貨幣基金會借錢，國基會四圍搵大國度水，即將召開的G20峰會，主題就是如何援助東歐國家，即係話歐盟搞唔掂，要向世界各地求助；阿爺怕第三波會吹到亞洲，到時區內經濟會再來一個深插。

在金融海嘯一波一波擴散的過程中，在海嘯震央美國仍未止血時，真係要打醒十二分精神。

美國上周五公佈2月失業率創8.1%的新高，職位損失65萬個，是自1939年以來首次連續3個月損失超過60萬個職位。睇美國失業率破10%將無可避免，美國失業和消費情況愈來愈差，壞影響稍後又會幅射到亞洲的出口國。

反觀香港的情況，目前未算太壞，因為背靠中國，香港受惠甚深，中國去年第4季提出4萬億救市大計，今年1、2月又大力放鬆銀根，造就內地股市和經濟都從低位反彈，內地經濟大，香港經濟細，香港受內地的反彈拉扯，今年頭1、2月的經濟氣氛不算太差，樓市有點反彈的味道，起碼割價後成交略為回升。

經濟反彈股市唔插

香港去年第4季GDP下跌2.5%，唔算跌得太多，日本去年第4季大跌12.7%，相比之下香港的跌幅只屬小兒科。香港政府預計今年全年GDP只跌2至3%，不少人認為政府估得太樂觀，其實內地都有此問題，這些估計數字都是假設上半年下跌、下半年反彈而得來，例如廣東省估計今年GDP增長8.5%，當中包括全年出口零增長，但目前廣東出口在急跌中，要得出全年出零增長的數字，意味上半年出口跌，下半年反彈回升，但下半年真是有得升嗎？如果美國是L形衰退，今年衰足全年，對中國和香港的影響又會如何?中國肯定會再出招，問題係再出招頂唔頂得順而已。

美國股市急挫穿底，內地股市彈高後回吐，仍處於不低的位置，香港夾在兩強之間，既不太跟早前內地的升市，亦跟唔足美國的跌市，因為香港的經濟現狀未去到好差的狀況，還有下半年經濟回升的預期（香港政府都係咁講），所以股市跌到咁上下就唔想再跌。

若果較差的情況出現，美國L形衰退的走勢一旦確認，海嘯一波一波向亞洲擴散時，恐怕香港經濟會進一步惡化，香港股市還要進入漫長的探底過程。

陸羽仁

閱讀全文...