2009年3月3日 供股供出災

　　匯控供股供出股災，佢自己股價在外圍急跌，匯控的美國預託證券價跌到43.83元，大跌13.12元，比香港上週五收市價56.95元，急插23%，匯控咁跌法，亦拖住其他股份跌，美國預託證券成交價反映恒指跌1054點，跌到11263點，單係匯控就將恒指推低335點!

　　匯控公布供股後先令英國銀行股急挫，再拖低埋美國市，美國自己本身亦唔掂，AIG宣布第四季勁蝕617億美元，等如每分鐘虧損46萬美元，每股虧損22.9美元(股價只有42美仙)，相信係美國有史以來季度虧蝕最甘嘅美國企業。壞消息紛呈，反映恐慌烈指數的芝加哥期权交易所波动指数（VIX）跳升近14%至52.65，美國投資者紛紛沽售股票，將資金轉入債券避險，杜指開市便插穿7000點大關至6938點，之後每況愈下，中午跌至6817點才稍為喘定。杜指午後在低位窄幅橫行，尾市跌幅再擴大，失守6800點水平，以接近全日最低位收市。

　　美股昨日已經係連續第四天下跌，杜指收市報6763點，大瀉300點或4.2%；標普500指數險守700點，報701點，挫34點或4.7%，係1997年10月股災以來最低；納指下滑55點或4%，報1323點。紐約證交所交投活躍，成交19.8億股。杜指期貨最新報6794點，升4點，比現貨高水31點。

　　杜指30隻成份股全線向下，重災區仍然係金融類股份，花旗集團成為杜指跌市冠軍，勁跌兩成至1.2美元，距仙股不遠矣；摩根大通跌7.4%至21.16美元，而美銀和美國運通齊挫逾8%至3.63美元和11.06美元。Fifth Third Bancorp嘅首度投資員Keith Wirtz接受彭博電視訪問時話，「你已差不多沒有理由去持有銀行股，實在太動蕩了！」

　　美股杜指跌穿7000點都止唔到瀉，只識跌唔識彈，災味好濃。港股上個月仲頂住，一過咗上月期指結算就唔再有人頂，而家又整多劑匯控低價供股，真係無眼睇。匯控俾人狂掟，又真係掟得有道理，主要因為佢業績意外地差，兼要低價供股所致，部份基金有啲不問價出貨止蝕的味道。之前一眾外資行出報告唱衰匯控，匯控俾人感覺係「無事無事」，又無出盈警，所以分析員才會估佢盈利唔跌得多，結果來個反高潮，08年全年純利跌70%，投資者自然狂掟貨。

　　好多朋友問揸住匯控好唔好供，我分析吓供股或唔供股的風險，供股的風險係供完匯控再跌，跌完再要供，愈跌愈低，愈供愈多。唔供股的風險係咁平28元一股都唔買，將來3、5年後匯控或者升番上100元以上，將來好泵心。

　　我認為匯控再要供股集資的可能性存在，一直叫匯控分拆放棄美國業務的基金Vinke Asset Management LLC估計，匯控旗下的美國匯豐融資客觀上已資不抵債，匯控要搞掂美國呢筆蘇州屎，最後可能要蝕多340億美元，如果係咁，真係怕佢供多一次都未夠，所以不要以為現階段買匯控無風險。

　　再者，而家供股，唔係28元一股買匯控，而係以市價買，此話何解，假設匯控除權日股價係43元，供股權除了出來後可以自由買賣，你唔供可以將之賣走之外，理論上正股43元，一份28元供股的供股權值15元，所以你唔供可以賣供股權攞差價走，或者你持貨太少供股權賣唔到，你一供完攞咗新股都可以當碎股賣，所以供股的真正代價是當時的市價，而不是28元。

　　我自己手上亦揸咗啲千年匯控，你問我如何，我傾向唔供，把供股權賣掉，此舉要冒上匯控將來康復後股價大升的風險，不過我的想法好簡單，而家唔以市價供股，將來匯控還有機會跌得更低，將來再買都未遲，或者等大跌市時，買一些已經大跌但比金融股安全的股份(例如盈富基金或H股指數基金)，佢地跌無匯控跌咁多，升起上來唔會輸俾匯控。我有留意股市，唔怕無買唔到平貨。

　　唯一例外的是「閒錢好多的一族」，他們平日不留意股市，唔供股將來跌到好殘都唔會再買，或者大跌市又唔敢買，唔供可能真係錯過買平貨的機會，這批人真係用啲閒錢去供股，若預咗供完可能會再跌，咁就供吓都無所謂啦。

　　陸羽仁