2009年3月6日 口術無用

美股又肚瀉，評級機構穆迪投資話會調低美國最大銀行摩根大通的信貸評級，加上投資者對中國有新的刺激經濟措施出台的希望落空，市場投資氣氛悲觀，金融股帶頭下滑，美股昨日再插，不止抹去了日前反彈的150點，而且輸突。杜指走勢惡劣，開市插水逾100點，略作掙扎後便繼續反覆下滑，可以講係由早跌到晚，好友全面捱打。

杜指收市報6594點，大跌281點或4.1%，再創1997年4月以來新低；標普500指數跑輸大市，再度失守700 點，收報683點，跌30點成4.3%，係自 1996年10月以來首次收在700點之下；納指跌54點或4%，報1300點。紐約證交所成交18.8億股。杜指期貨最新報6614點，比現貨收市高 20點。

金融股係跌市重災區，匯控(00005)在美國的ADR股價自不能倖免，收市再創新低，報41.3元，比香港收市價低7.8%；而中移動則靠穩，收報65.99元，只比香港收市價低0.7%，ADR按比例調整的恒指報11875點，比香港低336點。

穆迪投資昨日表示，正在重新檢討美銀和富國銀行的評級，同時間調低了摩根大通的信貸評級，金融類股份紛紛插水，推低大市。摩根大通大跌14%至16.6美元，而美銀勁挫11.7%至3.17美元，富國銀行跌近16%至8.12美元。

曾經係全球最大的銀行的花旗集團，佢嘅股票終於可以喺1元店買得到。花旗集團連續五季業績錄得虧損，蝕咗375億，雖然上周美國政府已注資450億美元以協助抗衡未來的虧損，但投資者已對花旗集團失哂信心，紛紛拋售，股價曾一度跌至97美仙的歷史新低，收市報1.02美元，大跌近一成，以一個最平的漢堡包價錢，已經買到一股花旗，仲有錢找。

花旗今年已跌了85%，市值衹有56億美元，比較2006年底的高峰期差天共地，當時該行市值有2772億美元，股價55.7美元。以市值比較，花旗如今已跌到全球第184位，甚至排在馬來西亞的Bumiputra-Commerce Holdings 和花旗擁有20%股權的士耳其銀行Akbank TAS，花旗股價咁低，皆因佢已經變成一間負資產公司。有好多人話香港匯控股價而家好平，好抵買，如果和同類的美國、英國金融股做個比較，匯控並唔便宜，等佢下個月供完股反彈完，小心仲要回吐。

保險企業方面，由於投資者不知怎樣計算該類企業投資在地產和相關資產方面的價值，因而沽出相關股份，Hartford Insurance、保誠和MetLife等保險股份別勁跌近17.8%至19.7%！所以唔好以為宏利唔似AIG，無乜沽出信貸違約調期就無事，因為全球衰退，各種資產都大貶值，保險公司所作的各種投資，如果睇番貼現價值，都幾大鑊。

美國奧本大學金融學教授James Barth話，「真是壞消息！人們或許以為政府的刺激經濟措施可能起到些正面作用，但在挽回投資者信心上，卻無濟於事，大家擔心的是，政府總有一天會對花旗說，『我受夠了』。」

大家應該有留意，美國總統奧巴馬早兩日唱好股市，但我就無乜點講，實際上我係唔知點講佢好。奧巴馬話，站在長遠角度和市盈率的衡量，現時投資股市都係一個好選擇。我當時的感覺是:若一個美國總統要用到出口術呢招來唱好股市，呢個總統就真係無乜橋啦，美國總統應該用行動來支持股市，唔係用把口來支持。

美股杜指今次由奧巴馬上任炒到9000點高位回落，我好快都話市場同佢嘅蜜月期玩完，但都想像唔到蜜月期係完得咁肉酸。杜指一直跌，就算在8000點大關唔彈，到破低位7400點之後都想彈，但美國政府無做到任何嘢，令股市有一個真正理由反彈。結果最近兩次小反彈，一次係由不在奧巴馬政府主流的聯儲局主席伯南克話不會國有化銀行促成，昨日那次反彈則是憧憬中國會擴大救經濟計劃所致，美股要炒中國救市消息，都真係幾羞家，結果證實係一廂情願，自然要再插。

照目前的形勢看，不要期望美國政府救市，奧巴馬政府就如童子軍，憑把口講「Change」(改變)上台，實際上卻在跌市時造出好多不利商業的政策，例如大手向有錢人加稅，我對此無道德判斷，只是認為奧巴馬做這事手段幾粗糙，只係夾硬來，向美國最有勢力的華爾街集團宣戰，搞到預算案也有可能不通過，還說不會因為市況短期波動而妥協，就真係要預咗市況大波動啦。恐怕美股要跌到過籠，跌到一些超賣位才回頭，杜指6000點大關應該有點支持吧。

陸羽仁